O EDL está integrado por profesoras que representan as diferentes etapas educativas do noso centro e que, mediante a planificación de diversas actividades, traballan por conseguir que os alumnos poidan chegar a ser competentes na lingua galega e usala con normalidade. Por mor disto, cada curso o equipo vertebra a súa planificación para asentar os seguintes obxectivos:

1.- Continuar o proceso xa en marcha de dinamización da lingua galega.

2.- Normalizar o emprego da lingua tanto no uso docente como nas actividades cotiás do centro.

3.- Implicar os alumnos no uso natural da lingua galega en diferentes funcións e usos.

As actividades pretenden motivar os rapaces e mergullalos en procesos creativos, onde poidan sociabilizar con compañeiros de cursos e etapas diferentes (obradoiro de contacontos, participación no premio literario Frei Martín Sarmiento...) e tamén teñan oportunidade de estar en contacto coa nosa tradición cultural (realización do obradoiro de cultura popular Vivamos como galegos, celebración do magosto, o entroido...) así como de asociar a nosa lingua ás novas tecnoloxías (celebración do concurso de fotografía Ollada Atlántica, creación de cartaces motivadores...)

Alén disto, o EDL é o encargado de proporcionar información e recursos para que estas e outras actividades que xurdan ao longo do curso se poidan materializar.